![广华医院百年庆典](https://sc.tungwah.org.hk/gate/gb/www.tungwah.org.hk/upload/kwh100/kwh100_header_TC.jpg)
东华三院爱心天使共贺广华百岁诞辰宣传声
成立于一九一一年的广华医院,与香港一起成长,见证过去一个世纪的每个故事。为庆祝广华医院的百周年诞辰,东华三院属下十三间小学特别委派其学生参与录制共十三段以广华医院一百周年为主题的宣传声带,于香港商业一台播放。各录音收录如下,欢迎收听:
1. 广华医院的名称由来
大家知唔知道广华医院嘅「广华」系点解吖? 原来,佢嘅意思系要做一间「为广东华人治病嘅医院」。喺一百年前,九龙同埋新界都无医院架,如果市民病咗就真系好惨! 所以,政府就联同东华医院嘅总理同埋地区领袖,一齐发起兴建「广华医院」。广华医院系喺1911年成立,连同1870年成立嘅东华医院、同埋喺1929年成立嘅东华东院,后嚟就统称「东华三院」嘞!
我系东华三院姚达之纪念小学嘅梁咏恩同学,我祝广华医院100岁生日快乐!
2. 广华医院为何建于油麻地
今年我哋庆祝辛亥革命一百周年,其实,广华医院都有一百岁,佢仲系喺辛亥革命发起嘅前一日,即系10月9日落成嘅,系第一间为九龙同埋新界嘅居民兴建嘅医院。广华医院位处嘅油麻地,原来叫做「官涌」,系一百年前九龙发展最繁盛嘅地方。根据一本广华医院1917年出入院总册嘅资料显示,当时有唔少住喺远至荃湾、大埔嘅居民都嚟到广华医院医病,咁你话广华医院系咪帮咗好多人呢!
我系东华三院李赐豪小学嘅潘嘉宝同学,我都系喺广华医院出世架!
3. 广华医院始创时已中西医兼备
你哋估唔估到,喺一百年前广华医院创院嘅时候,佢系一间中医院定系西医院呢? 两个答案都啱! 广华医院一开始已经中西医兼备架嘞,早期嘅华人唔习惯睇西医,所以政府透过广华医院大力推动西医,到咗1960年代广华医院重建完成,佢已经成为一间具规模嘅西医院嘞。今年广华医院将会大力推展中西医住院病人服务,俾更多病人受惠。
我系东华三院罗裕积小学嘅庄德蓉同学,我祝广华医院100岁生日快乐!
4. 广华医院何时开始施赠门诊中药
广华医院喺创院嘅时候已经有免费医疗服务。由于中药材价格比较贵,所以最初唔能够负担喺门诊施赠中药。喺1922年,发生咗一件好人好事。当时有一位自称无名氏嘅小妇人,佢前后四次捐赠合共50,580元,要求广华办理埋施赠中药。此后,广华医院就加设基金,开始施赠中药。究竟50,580元即系几多钱? 原来当时嘅一幢新楼亦只不过系数千元架喳。
我系东华三院高可宁纪念小学嘅黄尔彦同学,我都系喺广华医院出世架!
5. 广华医院何时开始施赠门诊中药
广华医院喺创院嘅时候已经有免费医疗服务。由于中药材价格比较贵,所以最初唔能够负担喺门诊施赠中药。喺1922年,发生咗一件好人好事。当时有一位自称无名氏嘅小妇人,佢前后四次捐赠合共50,580元,要求广华办理埋施赠中药。此后,广华医院就加设基金,开始施赠中药。究竟50,580元即系几多钱? 原来当时嘅一幢新楼亦只不过系数千元架喳。
我系东华三院高可宁纪念小学嘅黄尔彦同学,我都系喺广华医院出世架!
6. 每八个新生婴孩便有一个是广华医院出生
广华医院创院初期已拨出一间病房作为产房,采用的是旧式接生方法。到咗1915年,广华医院开始聘请助产士提供西法接生。广华医院产房嘅出产量真系好惊人架:由1946年政府有出生注册纪录开始计,全港出生人口差唔多有4,860,000,而同期广华医院就占咗620,000个BB,即系话,香港平均每8个BB就有1个喺广华医院出生架嘞。
我系东华三院冼次云小学嘅余荔敏同学,我都系喺广华医院出世架!
7. 广华医院的急症室有多忙碌
你知唔知道广华医院嘅急症室有几忙碌呢?广华每年总共有十五万人次求诊,即系平均一日要处理410个求诊个案! 由于广华医院位于全港最繁忙嘅地区之一,佢嘅急症室经常要身肩重任,处理重大突发事件,好似上世纪九十年代嘅无味神探枪击案、尖沙咀加利大厦大火;喺2003年广华更加接收全港第一个沙士病人,成功避免沙士病毒喺医院散播。
我系东华三院港九电器商联会小学嘅詹若楠同学,我都系喺广华医院出世架!
8. 广华医院设全港第一个妇女健康普查部
广华医院喺1990年已经成立咗全港第一间妇女健康普查服务中心,中心最近公布咗服务数字,女士喺50岁后由于更年期荷尔蒙减少,每3个就有1个患有骨质疏松症,而50岁后嘅男士亦会每10个有1个患有骨质疏松症。咁,点先至可以改善骨质密度呢? 原来,我哋小朋友开始就应该多做运动,仲要食多啲高钙食物,第日年纪大就唔驶惊嘞!
我系东华三院黄士心小学嘅陈颖琳同学,我祝广华医院100岁生日快乐!
9. 广华医院有多少个门诊部
广华医院系一间全科医院,一直为市民提供中西医疗服务。广华医院总共有四个门诊部,分别系西医嘅全科门诊、专科门诊;以及系中医嘅普通科门诊、同埋专科门诊。广华成立一百年嚟,都秉承东华三院嘅传统,为市民提供免费医疗服务,单单系上个年度,已经有超过七十一万人次接受广华提供嘅免费中西医疗服务。
我系东华三院王余家洁纪念小学嘅赵伟然同学,我都系喺广华医院出世架!
10. 广华医院的全球最先进320排动态容积计算机断层扫描仪
你哋知唔知道东华三院喺广华医院设置咗一部全球最先进型号嘅计算机扫描仪?呢部仪器可以扫描到人体里面各个器官嘅健康状况,好似照心脏咁,只需要0.35秒 ,而且需要用嘅显影剂同埋辐射剂量特别少,扫描一次心脏产生嘅辐射量,就只有两毫希,低过一个人喺香港住一年吸收嘅幅射量。所谓「预防胜于治疗」,早啲知道身体有咩野问题,就可以及早治疗啦!
我系东华三院李东海小学嘅吴海盈同学,我都系喺广华医院出世架!
11. 广华医院有个「未病先医理」的上医馆
有病梗系要睇医生,无病都要睇医生? 「治未病」观念就系着重预防保健养生之道嘞。广华医院里面嘅「东华三院王泽森上医馆」以「治未病」为概念,首先为求诊者作体质辨识,再按佢地唔同体质同症状分流到唔同嘅专科门诊,务求做到唔生病、少生病、迟生病,生活质素自然更好啦。
我系东华三院周演森小学嘅潘嘉祺同学,我祝广华医院100岁生日快乐!
12. 东华三院文物馆—–从前的候诊大堂 今天的法定古迹
你有无留意到广华医院里面有一座好似庙宇咁样嘅建筑物呢? 呢座建筑物,原来系一百年前嘅候诊大堂,佢喺1970年活化成为「东华三院文物馆」,仲喺2010年被列为香港法定古迹添。文物馆揉合咗中西建筑,例如红砖绿瓦、门前嘅千步廊等都展现咗中国传统建筑特色;而拱门、拱窗、阁楼嘅设计又系20世纪初流行嘅西式建筑特色。大家有时间记得嚟东华三院文物馆参观吓!
我系东华三院鹤山学校嘅刘君政同学,我祝广华医院100岁生日快乐!
13. 全面的中西医住院病人服务,只此一家
香港嘅医院向嚟只有西医入病房,但系广华医院,将喺今年有一队由中西医医护人员组成嘅专业团队,将「中西医住院病人服务」推展到五个专科,包括内科、外科、妇科、骨科同埋儿科,为病人提供更好嘅服务。中医师除咗会巡房,仲会同西医一齐跟进住院病人嘅「排板」同埋出院后嘅覆诊。咁全面嘅中西医住院病人服务,全港只此一间架!
我系东华三院马锦灿纪念小学嘅曾建晴同学,我祝广华医院100岁生日快乐!